Innviðagreining og þróun húsnæðismála

Markmið verkefnisins er að gera ítarlegar greiningar á innviðum með tilliti til þróunar húsnæðismála.

Höfuðborgarsvæðið er og hefur verið í örum vexti. Þessi fjölgun íbúa er ein af helstu áskorum höfuðborgarsvæðisins. Þörf er á að greina stöðu innviða á höfuðborgarsvæðinu sérstaklega með tilliti til þeirra hröðu uppbyggingar sem verið hefur á svæðinu. Verkefnið er skilgreint sem áhersluverkefni sóknaráætlunar árið 2025. 

Í þessu verkefni voru gerðar ítarlegar greiningar á stöðu innviða með tilliti til þróunar húsnæðis á höfuðborgarsvæðinu. Þá var gerð greining á stöðu innviða innan sveitarfélaga og hverfa, með tilliti til íbúafjölda og íbúaþéttleika. Skoðað var aðgengi íbúa að innviðum svo sem skólum, sundlaugum, íþróttaaðstöðu, leikskólum, menningaraaðstöðu, verslun og þjónustu.

Mögulegt er að innviðagreiningin verði unnin samhliða verkefninu „Samanburðagreining á lykiltölum við sambærileg svæði erlendis“ sem einnig er hluti af framfylgd sóknaráætlunar höfuðborgarsvæðisins 2025- 2029. Í báðum verkefnunum felst að gera greiningar á korti og því gæti samþætting við úrvinnslu verkefnanna verið kostur.

Afurð verkefnisins er skýrsla sem varpar ljósi á aðgengi íbúa að þjónustuinnviðum höfuðborgarsvæðisins. Meðal þess sem kom fram er að aðgengi íbúa að grænum svæðum er almennt séð gott. Auk þess að sýna fram á þjónustuaðgengi, varpar skýrslan einnig ljósi á ýmis einkenni byggðarinnar á höfuðborgarsvæðinu. Má þar nefna aldurssamsetningu byggðar, fermetrafjölda á hvern íbúa, aldur húsnæðis, og íbúaþéttleika á milli hverfa.

Niðurstöður greiningarinnar munu liggja til grundvallar við áframhaldandi þróun og skipulagi innviða, og aðgengi að þeim, á höfuðborgarsvæðinu.

Verktaki var VSÓ Ráðgjöf ehf.