Nýtt svæðisskipulag höfuðborgarsvæðisins

Höfuðborgarsvæði 2040

Svæðisskipulagsnefnd höfuðborgarsvæðisins samþykkti þann 1. júní 2015 tillögu að nýju svæðisskipulagi höfuðborgarsvæðisins - Höfuðborgarsvæðið 2040.

Tillagan var auglýst og lá frammi til kynningar ásamt umsögn Skipulagsstofnunar frá 12. desember 2014 til og með 2. febrúar 2015. Alls bárust 43 athugsemdir á kynningartímabilinu.  Helstu breytingar sem gerðar hafa verið á auglýstri tillögu í kjölfar umfjöllunar um innkomnar athugsemdir eru:

- Vaxtamörk færð út við Vatnsendahlíð og sýnd utan um Grundarhverfi.
- Stofnvegakerfið var skilgreint.
- Græni trefillinn sýndur í Esjuhlíðum.
- Skerpt á skilgreiningu og lýsingu miðkjarna.
- Gerðar breytingar á merkingum strandar á þemakorti.
- Skerpt á málsmeðferð einstakra skipulagsþátta.

Sveitarstjórnir á höfuðborgarsvæðinu hafa staðfest samþykkt svæðisskipulagsnefndar. Svæðisskipulagsbreytingin hefur verið send Skipulagsstofnun til staðfestingar.

Að staðfestingu lokinni tekur Höfuðborgarsvæðið 2040 gildi. Við það falla úr gildi svæðisskipulag höfuðborgarsvæðisins 2001-2024 og svæðisskipulag vatnsverndar á höfuðborgarsvæðinu frá 1998.