Sameiginleg könnun Sambands íslenskra sveitarfélaga og Félags grunnskólakennara -Ágúst 2012

Sameiginleg könnun Sambands íslenskra sveitarfélaga og Félags grunnskólakennara sýnir að mikill meirihluti kennara eða yfir 81% er með 100% starfshlutfall og kennurum líður almennt vel í starfi þrátt fyrir að álag hafi aukist. Ríflega 86% svarenda sögðu líðan sína í starfi almennt góða eða oftar góða en slæma og næstum átta af hverjum tíu svarendum sögðu vinnuandann í sínum skóla frekar eða mjög góðan.

Svör kennara benda til þess að álag í starfi kennara hafi aukist á seinustu fimm árum. Rúmlega 77% svarenda sögðu álagið hafa aukist frekar eða mjög mikið á þessu tímabili, en einungis 0,7% töldu álagið hafa minnkað frekar eða mjög mikið. Það sem helst virðist hafa áhrif á meira álag í starfi er hegðun nemenda og aukinn fjöldi agavandamála sem og áhrif almenns niðurskurðar í grunnskólunum.

Í könnuninni var spurt um álit kennara á ímynd kennarastarfsins hjá nokkrum hópum. Kennarar töldu ímynd starfsins einna besta hjá kennurum sjálfum, nemendum og foreldrum þeirra. Hins vegar væri ímynd starfsins ekki eins góð í samfélaginu og í sveitarstjórn en verst væri hún í fjölmiðlum.

Þá töldu 43% kennara þörf á fleiri undirbúningsdögum og rúmlega helmingur kennara taldi rétt að starfsdagar væru fleiri en fimm.